WAZIRI wa Nchi Ofisi ya Waziri Mkuu anayeshughulikia Sera, Uratibu, Bunge, Kazi, Vijana, Ajira na Watu wenye Ulemavu, Mhe. Jenista Mhagama Februari 8, 2020 ametembelea na kukagua ujenzi wa majengo ya Kiwanda kipya cha bidhaa za ngozi kinachojengwa katika eneo la Gereza Kuu Karanga, Moshi na kuridhishwa na hatua kubwa zilizofikiwa.
Utekelezaji wa ujenzi wa mradi huo wa ubia kati ya Jeshi la Magereza na Mfuko wa Hifadhi ya Jamii kwa Watumishi wa Umma (PSSSF) upo katika awamu ya kwanza na hivi sasa umefikia asilimia 60 ya ujenzi wa majengo yote manne ambapo unatarajiwa kukamilika Machi 2, 2020 hivyo, kuwezesha ufungaji wa mashine mbalimbali za kiwanda hicho.
“Nimefarijika sana kwa hatua zilizofikiwa za ujenzi, leo Makamanda kwa kweli niwapongeze kwa kazi hii endeleeni kusimamia ujenzi huu kwa kasi kwani kiwanda hiki kina umuhimu mkubwa kwa upande wa serikali na manufaa ya kiwanda hicho ni ya kiuchumi,” amesema Mhagama.
Waziri Mhagama aliongezea kuwa, adhma ya Serikali ni kuhakikisha kuwa kiwanda hicho kinakamilika mapema kwani kina manufaa makubwa kwa taifa ikiwemo kutoa fursa nyingi za ajira kwa watanzania pamoja na kuongeza mapato serikalini.
Aidha, Waziri Mhagama amemwagiza Katibu Mkuu Ofisi ya Waziri Mkuu (Kazi, Ajira, Vijana na Wenye Ulemavu) Andrew Massawe kuhakikisha kuwa anaandaa mpango kazi wa utekelezeji wa mambo yote muhimu yanayohusiana na kiwanda hicho ili kiwanda kiweze kuanza uzalishaji mara baada ya ujenzi wake kukamilika.
“Tunapoendelea na ujenzi wa kiwanda hiki cha bidhaa za ngozi ni lazima twende sambamba na mambo mengine muhimu ikiwemo upatikanaji wa maji ya kutosha katika kiwanda hiki, usimikaji wa miundombinu ya umeme pamoja na kufanya maandalizi ya masoko ya bidhaa zitakazokuwa zikizalishwa na kiwandani”, amesisitiza Mhagama.
Kwa upande wake Mhandisi wa mradi huo, Mrakibu wa Magereza,  Julius Sukambi amesema kuwa utekelezaji wa mradi unafanyika usiku na mchana kwa kutumia wataalam wa Jeshi la Magereza, wafungwa na mafundi raia wa fani mbalimbali ikiwa ni jitihada za kuwezesha kukamilisha mradi huo kama ilivyokusudiwa.
Hatahivyo, Mhandisi huyo, Mrakibu wa Magereza, Julius Sukambi amemhakikishia Mhe. Mhagama kuwa ujenzi huo utakamilika kwa wakati na kwa viwango vilivyowekwa ifikapo Machi 2, 2020.
Januari 15, mwaka huu, Waziri wa Nchi, Ofisi ya Waziri Mkuu anayeshughulikia Sera, Bunge, Kazi, Ajira, Vijana na Watu Wenye Ulemavu, Mhe. Jenista Mhagama alitembelea mradi huo ambapo katika ziara hiyo, Waziri Mhagama alimuagiza Mkandarasi wa mradi kuongeza kasi ya ujenzi wa kiwanda hicho kilichopo katika eneo la Gereza Kuu Karanga, Moshi ili kiweze kukamilika kama ilivyokusudiwa.
Katika ziara hiyo, Waziri Mhagama alifuatana na Katibu Mkuu, Ofisi ya Waziri Mkuu (Kazi, Vijana, Ajira na Wenye Ulemavu) Bw. Andrew Massawe na Mkurugenzi Mkuu wa PSSSF, Bw. Hosea Kashimba.

Waziri wa Nchi, Ofisi ya Waziri Mkuu Sera, Bunge, Kazi, Ajira na Wenye Ulemavu), Mhe. Jenista Mhagama (wapili kulia) akitoa maelekezo leo Februari 8, 2020 Mkurugenzi Mkuu wa PSSSF, Bw. Hosea Kashimba (wapili kushoto) na Naibu Kamishna wa Magereza, Afwilile Mwakijungu(kushoto) ambaye ni Mtendaji Mkuu wa Shirika la Uzalishaji Mali la Magereza wakati wa ziara yake ya kukagua ujenzi wa mradi wa kiwanda cha Ngozi cha Karanga kinachojengwa kwa Ubia baina ya Mfuko wa Hifadhi ya Jamii kwa Watumishi wa Umma (PSSSF) na Jeshi la Magereza. Wakwanza kulia ni Katibu Mkuu, Ofisi ya Waziri Mkuu (Kazi, Vijana, Ajira na Wenye Ulemavu) Bw. Andrew Massawe.

Moja ya majengo katika mradi wa ujenzi wa kiwanda cha Ngozi cha Karanga kinachojengwa kwa Ubia baina ya Mfuko wa Hifadhi ya Jamii kwa Watumishi wa Umma (PSSSF) na Jeshi la Magereza likiwa limefikia hatua mbalimbali za ujenzi kama inavyoonekana katika picha. Jengo hilo litatumika kuhifadhia mashine ambazo tayari zimewasili bandarini.

Waziri wa Nchi, Ofisi ya Waziri Mkuu Sera, Bunge, Kazi, Ajira na Uwekezaji) Jenista Mhagama (wa tatu toka kushoto) pamoja na Katibu Mkuu Ofisi ya Waziri Mkuu (Kazi, Ajira, Vijana na Wenye Ulemavu) Andrew Massawe (wa pili toka kushoto) wakiongozana na Makamanda Waandamizi wa Jeshi la Magereza Nchini wakati wa ziara yake ya kukagua ujenzi wa mradi wa kiwanda cha Ngozi cha Karanga kinachojengwa kwa Ubia baina ya Mfuko wa Hifadhi ya Jamii kwa Watumishi wa Umma (PSSSF) na Gereza la Karanga lilolopo Moshi Mkoani Kilimanjaro, leo Februari 8, 2020.

Mhandisi wa Mradi wa ujenzi wa Kiwanda kipya cha bidhaa za ngozi, Mrakibu wa Magereza, Julius Sukambi(kulia) akisoma taarifa ya ujenzi mbele ya Waziri wa Nchi, Ofisi ya Waziri Mkuu Sera, Bunge, Kazi, Ajira na Uwekezaji) Jenista Mhagama (kushoto).

Mafundi wakiendelea na ujenzi wa majengo ya kiwanda hicho.